Дэлхийн банкнаас Монгол улсын эдийн засгийн тоймыг гаргажээ. Уг тоймоор 2011 оны эхний улиралд 9.9 хувьтай байсан эдийн засгийн өсөлт хоёрдугаар улиралд өмнөх оны мөн үетэй харьцуулахад 17.3 хувьд хүрчээ. Тээвэр 39.9 хувь, барилгын салбар 38.4 хувь өссөн бол орлого нэмэгдсэнээс үүдэн хэрэглээ тэлж жижиглэн болон бөөний худалдаа 24.7 хувиар өсчээ. Уул уурхай болон аж үйлдвэрийн салбар II улиралд 8.3 хувь, 12.9 хувиар тус тус өссөн дүн гарчээ. Эдгээр өсөлтөөс шалтгаалж ажилгүйдлийн түвшин энэ оны зургадугаар сард 8.7 хувь болтол буурсан байна. Албан бус хөдөлмөрийн зах эрчимтэй тэлж, бодит цалингийн хэмжээ 2010 оны арван хоёрдугаар сараас энэ оны зургадугаар сарын хооронд бараг хоёр дахин нэмэгдсэн аж.Тус тайланд “Дээд боловсролын үйлчилгээ улсын их дээд сургуулиуд төлбөртэй сургалтад шилжиж, хувийн их дээд сургуулиудын тоо нэмэгдэх байдлаар хэрэгжсэн. Иймээс, дээд боловсролын салбарт ногдох улсын төсвийн нийт зарлагын хэмжээ 14 орчим хувьд хэвээр байна. Энэ үзүүлэлт Хятад улсад 20 хувьтай байдаг.Өнөөдөр дээд сургуулийн нэг оюутанд ногдох төсвийн зарлага 339 орчим ам. доллар байгаа нь олон улсын стандартаас доогуур байна. Үүнтэй харьцуулахад, Эдийн засгийн хамтын ажиллагаа, хөгжлийн байгууллагын орнуудад их дээд сургуульд суралцаж байгаа оюутанд ногдох төсвийн зарлага 11.512 ам.доллар байна. Улсын их дээд сургуулийн үндсэн багш нарын цалин ойролцоогоор 300 ам. доллар байгаа нь ерөнхий боловсролын сургуулийн багш нарын цалингаас багахан зөрөөтэй байна. Улсын их дээд сургуулийн багш нарын дөнгөж 23 хувь, хувийн их дээд сургуулийн багш нарын 15 хувь нь докторын зэрэгтэй байна” хэмээн дурджээ. Банкны салбарт зээл олголт долдугаар сард 46 хувиар өсчээ. Чанаргүй зээлийн хэмжээ 390 тэрбум төгрөг байгаа аж. Хугацаа хэтэрсэн зээлийн хамт, чанаргүй зээлийн багц нь нийт олгогдсон зээлийн 10 хувьтай тэнцүү байгаа гэнэ. Төгрөгийн хадгаламж өмнөх оны мөн үетэй харьцуулахад 73 хувиар өсчээ.
