Би ямар мэргэжилтэй болох вэ?
Анх нийгмийн ажил мэргэжлийг сургуулийн нийгмийн ажилтны хүрээнд л төсөөлдөг байлаа. Тэр үеийн сургуулийн нийгмийн ажилтан гэхээр сурагчдыг нийгмийн идэвхитэй болгох үүднээс янз бүрийн арга хэмжээ зохион байгуулдаг тийм л хүн байсан. Сурагчдыг оролц гээд л идэвхитэй уриалдаг их л чанга хоолойтой хүн байж билээ. Сурагчдын зөвлөлийн багшаар давхар ажилладаг тэдний хийх ёстой ажил үүргийн хуваарилалтыг зааж зааварлаж өгдөг байсан. Нэг жил 9-р ангид байхдаа би ангийн дарга хийж байлаа. Тэр үед нийгмийн ажилтантай уулзаж ярих зүйл зөндөө байдаг байсан ч тэр болгон уулзаж чаддаггүй байсан. Тэгсэн хэрнээ л уулзмаар санагдаад хуралдаа байнга суудаг дарга байлаа. Энэ бүгдийг одоо бодоход нийгмийн ажилтантайгаа хамтран ажилладаг байсан болохоор л нийгмийн ажлыг сонирхож эхэлсэн юм шиг байгаа юм.
Тэгээд л 10-р ангиа төгсөөд мэргэжлийн сонгон шалгаруулалт хийгээд л энэ мэргэжлээр суралцахаар шийдсэн юм. Тэр жил англи хэлээрээ эсвэл нийгмээрээ явна гэж боддог байлаа. Англи хэлээрээ дагнан явах гэхээр хүмүүс жуулчны баазад л ажиллана биз гэцгээгээд тэгээд л нийгмээрээ явах болж энэ мэргэжлийг сонгосон юм. Нийгмийн ажлын ангийг сонгоод орж ирэхдээ нийгмийн ажлын анхны төсөөлөлтэй гэж өөрийгөө боддог байсан буруутсан байлаа. Нэгдүгээр курсын хаврын улиралд л энэ мэргэжлийн тухай дахин анхны төсөөлөлтэй болж цаашид улам их идэвхитэй суралцана гэж шийдсэн. Нийгмийн ажлын тухай анхны төсөөлөл мэдлэг нь их л гүн гүнзгий утгыг цаанаа агуулаад байх шиг санагддаг байж билээ. Нэг л их ойд төөрчихсөн юм шиг юуг нь ч ойлгохгүй миний амьдрал бүрхэг байна даа гэж боддог байсан нь инээдтэй шүү. Одоо энэ мэргэжлээр суралцаж эхлээд 3 дахь жилээ үдэх гэж байгаа Ариунцэцэг миний бие энэ цаг мөчид нийгмийн ажил мэргэжлийн тухай өөрийн гэсэн тодорхой ойлголт мэдлэгтэй болж чадсан юм. Нийгмийн ажлыг дан ганц сургуулийн нийгмийн ажилтны хүрээгээр сэтгэж ойлгох нь буруу юм байна гэдгийг сүүлд ойлгосон. Өнөөдөр монголын нийгэм тэр чигээрээ л нийгмийн ажлыг үгүйлж байна гэж хэлж болно.
Гэтэл нийгмийн хаа сайгүй үйл ажиллагаагаа явуулах мэргэжлийн нийгмийн ажилтнууд их хомс байгаа нь бидний мэргэжлийн нэр хүндийг унагаж, нийгмийн ажилтны ёс зүйг зөрчиж байгаа явдал юм. Тиймээс ч шинээр бэлтгэгдэн гарах гэж байгаа шинэ нийгмийн ажилтнууд болох бидэнд хийх зүйл маш их байна. Миний хувьд гэвэл би энэ мэргэжлээрээ суралцан төгсөөд шууд ажлын байранд очиж ажиллах сонирхолгүй байна. Нэгдүгээрт надад ажлын туршлага мэдлэг дутагдана. Хоёрдугаарт 4 жилийн боловсрол гэж юу байхав дээ гэж би боддог.
Төгсөж гараад энэ мэргэжлээрээ дахин суралцах төлөвлөгөөтэй байгаа. 2 юм уу 3 жил суралцвал нийгмийн ажлын талаар миний ойлголт мэдлэг тодорхой хэмжээнд ахина гэж бодож байна. Тэр үед л ажлын байран дээрээ гарч нийгмийн ажил гэж амьдрал дээр яг ямар байдаг гэдгийг мэдрэх болно. Бид нарын хувьд гэвэл тийм тийм онол гэж хичээл заалгадаг болохоос практикт нийгмийн ажлын үйлчилгээ үзүүлсэн нь ховор. Тэгэхээр би хүмүүст нийгмийн ажлын тухай сайн ойлгуулж чаддаг болтлоо сурна гэж бодож байна. Тэр үедээ л бусдын сайн сайхны төлөө гэж нүүр бардам хэлж чадахаар болно гэдэгтээ өөртөө маш их итгэлтэй байна.
Анх яагаад ч юм бэ би нийгмийн ажилтан болж чадах болов уу? гэж багш нараасаа асуумаар санагддаг байсан. Тэр үед нэг л өөртөө итгэлгүй ер нь л бүх зүйлд айдастай ханддаг байлаа. Одоо бол энэ мэргэжил надад өөртөө итгэх итгэл, өөрийгөө үнэлэх үнэлэмж зэргийг өгч чадсан. Тиймээс би энэ мэргэжлээрээ насан туршдаа ажиллаж энэ мэргэжлийн сайн сайхан гэж юу байж болох бүхий л зүйлийг хийж бүтээж явна гэж боддог болсон. Би мэргэжилдээ хайртай.
